ශාකල්‍යා

තරු වළාකුළු අස්සෙ
හැංගි මුත්තං කරන
මහ රෑක නංගිලා 
දෙන්නා මැද්දෑවෙ ඉද
ඒ තාරකා ගැන - පුංචි කවි කියන්නට......
අනෝරා වැහි දාක
ඉස්කෝලෙ නොයා ඉද
බෝනික්කො සිප් පුරන - හරි පුදුම ඉස්කෝලෙ
අම්මාගෙ සාරි ඇද - පුංචි ටීචර් වෙන්න
දුවේ නුඹ හිටිය නම්.....

කරල් දෙකකට කොන්ඩෙ
බැදන් සුදු ගවුම ඇද
නංගිලගෙ  අක්කා වී
ඉස්කෝලෙ ගොස් එන්න
ඉර ගිලුණු කළුවරක - හෙම්බත්ව ගෙදර එන
තාත්තගෙ පෙර මගට - තරු දෑස් දල්වන්න
ඇග වටේ දැවටෙන්න
ගෙයි පුරා ඉගිලෙන්න
උණුහුමට ගුලිවෙලා
පපුව උඩ නිදියන්න
දුවේ නුඹ හිටියනම්.......

ගෙයි සාලෙ මැද්දෑවෙ
හුරතලෙන් හිනාවෙන
දෑස් දල්වා බලා - මොකුත් නොකියා ඉන්න
පිංතූරයක් නොවී
අනේ නුඹ හිටිය නම්.......

                       -  මංජුල ප්‍ර‍භාත් හෙට්ටිආරච්චි